ورقة

ليش هيك قالبة خلقتك؟؟؟
صاير معك شي؟؟؟
شبك مبوزمة؟؟؟؟
بشرفي مأتيني؟؟؟
زعلانة من شي؟؟؟
حدا مزعلك؟؟؟
روقي ولا يهمك
خلصوني مو صاير معي شي
بس يمكن هالأيام عم أنسى ارسم البسمة على وجي، أصلاً لو هالبسمة يلي على وجوهكون حقيقية ما كنت نسيت، وما كنتوا سألتوني، يمكن كنت دائماً رغم كل شي قرف، ووجع وتشائم بهالدنيا حب أطلع بالنص المليان من الكاسة مع أنو بعمري ما شفت فيا نقطة مي
بس خلص مليت كون هبلة
مليت كلما تسكر بوشي باب اضحك وقول: بكرة بينفتحلي واحد غيرو أكبر.. وأمسك ورقة وقلم وبلش خربش وفش خلقي، وجن بالكتابة وقول لحالي: فشه هون أحسن ما فشه بحدا تاني، على القليلة الورقة ما بتأول لحدا، وبيضل الحكي بيناتنا، وبعمرا ما عملت حالا عم تسمعني وبعدين دارت وشا وضحكت عليّ، يا حرام هيّ شو بتتحمل مني سوداوية وعذاب وبتضل ساكتة عم تسمعلي، مع أني بين الناس بكون مخلوقة أكثر متفائلة، بحب كون قوية قدامون، مع أني من جوا شقفة ورقة خريف مغبّرة عم تقاوم العواصف لأنو مالا ناوية تترك الشجرة، ما بدا حدا يسرقلا حلما… حلما أنو تكبر على مهلا… وماتأدر تكره حدا… سحابة الأمل ما تروح.. ولون المطر ما يتغير.. والنجمة البعيدة تضل عم تضويلا
عم بلش استطرد كتير… على كل حال… حكيت كتير اليوم.. يمكن لأنو الكتابة بيغنيا ضياع متل هيك أحلام مالاطعمة